Ayətullah Vəhidin Ayətullah Xameneilə müxalif mövqedə olması fikrini formalaşdırmaq istəyənlərə cavab

Neçə ildir bir dəstə sarsaq adam, başqa sarsaq adamlar tərəfindən düzəldilmiş bir videonu paylaşırlar ki, həmin videoda Ayətullah Vəhid Xorasani guya Ayətullah Xameneiyə qarşı ağır ifadələr işlədir.

Bu video ilə onlar Ayətullah Vəhidin Ayətullah Xameneilə müxalif və düşmən mövqeyində olması fikrini formalaşdırmaq istəyirlər. Yəni demək istəyirlər ki, baxın, böyük alim ona və fikirlərinə qarşıdır. Həmişə və hər yerdə olduğu kimi bu cılız insanlar da, özləri bir zibil olmadıqları üçün ağır çəkili adamlardan istifadə edərək öz məqsədlərinə çatmaq istəyirlər. Yəqin ki, həmin video çoxunuzun qarşısına çıxıb. Deməli, Ayətullah Xameneinin məddahlarla keçirdiyi görüşdəki çıxışından "camaatı şiddətlə ağlamağa çağırmayın, bərk salavat deməyə səsləməyin" sözlərini kəsərək ardına Ayətullah Vəhidin dərslərinin birində "bu nə axmaq sözlərdir, insan gərək bərk ağlasın" filan hissəsini calayaraq fitnə və ixtilaf salırlar. Hətta həmin videoda Ayətullah Xameneinin dediyi sözlərin sonuna əvvəldə "yalan məlumat və ya zəif məlumatı rövzə deyərək oxuyaraq camaatı ağlatmayın, çünki hər bir vasitə ilə ağlatmaq bizim məqsədimiz deyil" sözlərindən "ağlatmaq məqsəd deyil" sözlərini kəsərək əlavə də ediblər ki, Ayətullah Xameneinin rövzə və mərsiyə və ümumiyyətlə əzadarlıq məclislərinə qarşı olduğunu qələmə vermək istəyiblər. Əlbəttə ki, bu video ilə bir çox insanları aldatmağa müvəffəq də olublar. Halbuki Ayətullah Vəhidə aid olan bu çıxış Ayətullah Xameneinin çıxışından 3 il əvvəl olan bir çıxışdır. Ayətullah Xameneinin bu sözlərinə gəldikdə isə o məddahlarla görüşündə yalan və zəif rəvayət söyləməklə camaatı ağlatmağın düzgün olmadığını bildirərək deyir ki, siz məclislərdə həm düzgün rəvayətlər oxuyun, həm də məclisi elə aparın ki, camaat siz demədən belə möhkəm ağlasın. Əgər məclisi ələ ala bilməsəz, elə hey deyin ki, möhkəm ağlayın, alınmaz. Amma fitnəkarlar həmişə olduğu kimi çıxışdan 2 cümlə kəsərək, ardına da əvvəldə deyilən bir cümləni əlavə edərək ixtilaf toxumu səpərək fitnə yaratmaqdadılar.

Bu gün yeni bir video ortaya çıxardıblar. Ayətullah Vəhidin keçən il İmam Hadinin(ə) şəhadətindən öncə yenə dərslərinin birində etdiyi bir çıxışı paylaşırlar ki, Ayətullah Vəhid deyir İmam Hadinin(ə) şəhadətini geniş şəkildə keçirin. Həmin bununla yanaşı Ayətullah Xameneinin bu ilki Novruz təbrikini paylaşır və deyirlər ki, 2 nəfərin İmam Hadinin(ə) şəhadətinə təsadüf edən Novruza olan münasibətinə özünüz qiymət verin. Əvvəla insan nə qədər alçaq olmalıdır ki, keçən il olan çıxışı bu ilki çıxış kimi təqdim etsin. İkincisi, İranda Novruz bayramı ilə yeni il təhvil olur. Ayətullah Xamenei Novruz bayramı ilə təbrik etməklə yeni ilin bərəkətli olmasını arzu edir. Özü də tək İran xalqına yox, bütün Novruz bayramını qeyd edən xalqlara təbrik deyir həmin təbrikdə. Üçüncüsü, bu gün səhər Məşhəddə ənənəvi yeni il çıxışında o, İmam Hadinin(ə) şəhadətilə bağlı öz təsliyətini də ərz edib və bu barədə bir neçə cümlə də buyurub. Dördüncüsü, hal-hazırda Təbrizdəyəm və camaatın əksəriyyətinin bayram olmasına baxmayaraq televiziya kanallarında rövzə və mərsiyələr göstərməsinə necə etiraz etməsini yaxından görürəm. Yəni Ayətullah Xameneini İmam Hadiyə(ə) qarşı qoyan əclaflar bilməlidirlər ki, İran əhalisi Novruz bayramı günündə ölkədə bayram əhval ruhiyyəsi olmadığı üçün başda Ayətullah Xamenei olmaqla ruhaniyyətə etiraz edirlər. Sosial şəbəkələrdə bizim ölkənin televiziya kanallarından olan bayram verilişlərinin şəkilləri və videoları ilə yanaşı öz ölkələrinin televiziya kanallarında göstərilən rövzə və mərsiyələrin şəkil və videolarını paylaşaraq ölkədə bayram əhval ruhiyyəsi olmadığı üçün etiraz edirlər. Amma mən əminəm ki, həmin əclaflar bunu çox gözəl bilirlər. Sadəcə olaraq Ayətillah Xameneiyə öz düşmənçiliklərinin və nifrətlərinin müqabilində camaatın ona məhəbbət göstərməsini həzm edə bilmədikləri üçün yalan və fitnə ilə bu məhəbbətin qarşısını almaq istəyirlər. Yenə bunu vuruğulayım ki, özləri bir zibil olmadığı üçün Ayətullah Vəhidin adında istifadə edirlər ki, yalanlarının kəsəri olsun. Amma Quran buyurduğu kimi, bu səfehlər dərya üzərindəki köpük kimidirlər. Yəni onlar haqqı çox qısa müddət ləkələyə bilərlər. Haqq həmişə haqdır və batil ona heç vaxt yol tapa bilməyəcək.

Vüsal Sadıxov

Bu bölmədə